Poytaxtimizda “O‘zbekiston — Qozog‘iston: aholi salomatligi yo‘lida – tibbiyot sohasida hamkorlik” mavzusida forum tashkil qilindi. Unda 120 nafardan ortiq qardosh mamlakat vakillari ishtirok etib, ikki tomonlama aloqalar istiqbollari muhokama qilindi.

O‘zbekiston va Qozog‘iston o‘rtasidagi hamkorlik umumiy do‘stlik va yaxshi qo‘shnichilik tamoyillariga asoslangan. Ikki davlat rahbarlarining sa’y-harakatlari bilan strategik sheriklik hamda ittifoqchilik munosabatlari izchil rivojlanmoqda.

Sog‘liqni saqlash sohasidagi aloqalar ham yildan yilga mustahkamlanmoqda. Shu kunlarda mamlakatimizda o‘tkazilayotgan Qozog‘iston tibbiyoti kunlari bu yo‘nalishdagi hamkorlikning mantiqiy davomi hisoblanadi.

Qozog‘istondan kelgan yuqori malakali mutaxassislar to‘rt kun davomida Samarqand, Buxoro, Farg‘ona viloyatlari hamda Qoraqalpog‘iston Respublikasidagi tibbiyot muassasalarida bo‘lib, kardiologiya, neyroxirurgiya, travmatologiya, urologiya, onkologiya, ginekologiya, bolalar jarrohligi, endokrinologiya va boshqa yo‘nalishlarda 444 ta tibbiy maslahat, 64 ta jarrohlik amaliyoti hamda 57 ta seminar va mahorat darslarini o‘tkazdilar.

Milliy tibbiyot markazi hamda ixtisoslashgan tibbiyot muassasalarida ham qo‘shma yuqori texnologik jarrohlik amaliyotlari bajarildi.

Tadbir davomida Qozog‘iston Sog‘liqni saqlash vazirligi tomonidan mamograf, kompyuter tomografi, rentgen, UTT va laboratoriya uskunalari bilan jihozlangan to‘rtta mobil tibbiyot majmuasi mamlakatimizga keltirildi. Ushbu majmualar yordamida Sirdaryo va Jizzax viloyatlarida 1240 nafar aholi birlamchi tibbiy ko‘rikdan o‘tkazildi.

Forum sessiyalari davomida ikki mamlakat mutaxassislari yuqori texnologik jarrohlik amaliyotlarida zamonaviy texnologiyalarni qo‘llash, innovatsiyalarga yo‘l ochish, bilim va tajriba almashish masalalarini muhokama qildilar.

Tibbiy ta’lim yo‘nalishida faoliyat yuritayotgan mutaxassislar ham akademik mobillikni, bilim va ko‘nikmalar almashinuvini mustahkamlash masalalarida fikr almashdilar.

Toshkent davlat tibbiyot universitetida Qozog‘istonning yettita oliy ta’lim muassasasi vakillari tomonidan talabalar o‘rtasida fan olimpiadasi va sport musobaqalari tashkil etildi, g‘oliblar forum doirasida taqdirlandi.

Anjumanda ikki davlatning tibbiyot oliygohlari, ilmiy va ixtisoslashgan tibbiyot markazlari o‘rtasida bir qator memorandumlar imzolandi.