2025-yil 16-20 fevral kunlari Akademik V.Vahidov nomidagi Respublika Ixtisoslashtirilgan Xirurgiya Ilmiy-amaliy Tibbiyot Markazida tug‘ma yurak nuqsoni bo‘lgan bolalarga kardiojarrohlik yordam ko‘rsatish bo‘yicha yirik xayriya aksiyasi o‘tkazildi. Ushbu tashabbus Saudiya Arabistonining Podshoh Salmon gumanitar yordami markazi va Islom olami ligasi ko‘magida amalga oshirilib, O‘zbekiston va Saudiya Arabistonining yetakchi kardioxirurglari ishtirok etdi.
Xayriya loyihasining natijalari
Loyiha doirasida 100 nafarga yaqin bola to‘liq tibbiy ko‘rikdan o‘tkazildi, ulardan 80 nafariga jarrohlik amaliyoti o‘tkazildi. Bir hafta davomida Saudiya Arabistonidan kelgan 30 nafar yuqori malakali mutaxassis o‘zbekistonlik shifokorlar bilan hamkorlikda 20 ta ochiq yurak operatsiyasi va 60 dan ortiq endovaskulyar muolajalarni muvaffaqiyatli amalga oshirdi. Ushbu operatsiyalar o‘nlab bolalarga yangi hayot bag‘ishlab, ularning oilalariga umid va quvonch ulashdi.
Loyiha nafaqat bemor bolalar uchun muhim bo‘ldi, balki O‘zbekiston va Saudiya Arabistonining yetakchi shifokorlari o‘rtasida tajriba almashish uchun noyob imkoniyat yaratdi. Akademik V. Vahidov nomidagi Xirurgiya Markazi mutaxassislari ilg‘or jarrohlik usullari bilan tanishib, xalqaro standartlarga mos yangi davolash metodlarini o‘zlashtirdi. Bu esa O‘zbekistonda kardioxirurgiya sohasining yanada rivojlanishiga katta turtki beradi.
Tibbiyot sohasidagi xalqaro hamkorlik
Ushbu xayriya loyihasi O‘zbekiston va Saudiya Arabistoni o‘rtasidagi samarali hamkorlikning yorqin namunasi bo‘ldi. Loyihaning muvaffaqiyatli amalga oshirilishi har ikki davlatning Sog‘liqni saqlash va Tashqi ishlar vazirliklari, shuningdek, O‘zbekistonning Saudiya Arabistonidagi elchixonasi tomonidan qo‘llab-quvvatlandi. Ushbu hamkorlik nafaqat mamlakatimiz tibbiyot sohasining rivojlanishiga, balki uzoq muddatli strategik sheriklikni mustahkamlashga xizmat qiladi.
Ramazon oyi oldidan saxovat va mehr-shafqat
Bu xayriya aksiyasining Ramazon oyi arafasida o‘tkazilishi uni yanada ahamiyatli qildi. Axir Ramazon – mehr-shafqat, insonparvarlik va ezgu amallar oyidir. Podshoh Salmon gumanitar yordami markazi va Islom olami ligasi minglab ehtiyojmand insonlarga yordam beruvchi yirik xalqaro loyihalarni amalga oshirib kelmoqda.
Akademik V. Vahidov nomidagi Xirurgiya Markazi ushbu muhim tashabbusda ishtirok etgan barcha mutaxassislarga, shuningdek, Saudiya Arabistonidan kelgan hamkorlarga chuqur minnatdorlik bildiradi. Bunday loyihalar tufayli tibbiy yordam yanada qulay va samarali bo‘lib, yurak xastaligidan aziyat chekkan bolalar esa sog‘lom va baxtli hayot kechirish imkoniyatiga ega bo‘ladilar.
