"Saudiya Arabistoni Podshohi Salmon Gumanitar Yordam Markazi Ko'magida O'zbekistonda Kardioxirurgik Amaliyotlar"

Saudiya Arabistoni Podshohi Salmon Gumanitar Yordam Markazi tomonidan O'zbekiston Respublikasiga yo'naltirilgan hayriya aksiyasi doirasida muhim tibbiy tashabbus amalga oshirildi. Jumladan, «Akademik V.Vohidov nomidagi Respublika Ixtisoslashtirilgan Xirurgiya Ilmiy-Amaliy Tibbiyot Markazi» davlat muassasasida kardioxirurgik jarrohlik amaliyotlarini o'tkazish uchun 20 dan ortiq yetuk mutaxassislar tashrif buyurdi. Ushbu tashrif Sog'liqni saqlash vazirligi, Tashqi ishlar vazirligi hamda O’zbekiston Respublikasining Saudiya Arabistonidagi elchixonasi ko'magida tashkil etildi.

Bir hafta davomida markaz mutaxassislari bilan hamkorlikda ochiq va yopiq kardioxirurgik jarrohlik amaliyotlarini o'tkazish rejalashtirilgan bo'lib, jarayon davomida bemorlarga yuqori sifatli xizmat ko'rsatiladi. Shuningdek, ushbu amaliyotlarning barcha xarajatlari hayriya fondi tomonidan to'liq qoplanadi.

Loyihaning amalga oshirilishi oldidan «Akademik V.Vohidov nomidagi Respublika Ixtisoslashtirilgan Xirurgiya Ilmiy-Amaliy Tibbiyot Markazi»da amaliy anjuman bo'lib o'tdi. Tadbirda Saudiya Arabistonining O'zbekistondagi elchisi Yousef Saleh Algahrah Al-Otaibi, Sog'liqni saqlash vazirining birinchi o'rinbosari Davron Tahirovich Sultanov va Tashqi ishlar vazirligining vakolatli xodimlari so'zga chiqib, mazkur tashabbusning ahamiyatini ta'kidlab, loyihaga omad tiladilar.