Saudiya Arabistoni Podshohi Salmon Gumanitar Yordam Markazi tomonidan O'zbekiston Respublikasiga hayriya aksiyasi doirasida muhim tibbiy tashabbus amalga oshirildi. Jumladan,«Akademik V.Vohidov nomidagi Respublika Ixtisoslashtirilgan Xirurgiya Ilmiy-Amaliy Tibbiyot Markazi» davlat muassasasida kardioxirurgik jarrohlik amaliyotini o'tkazish uchun 20 dan ortiq yetuk mutaxassislar tashrif buyurdi. Ushbu tashrif Sog'liqni saqlash vazirligi, Tashqi ishlar vazirligi va O’zbekiston Respublikasining Saudiya Arabistonidagi elchixona ko'magida amalga oshirildi.

Tashrifning ochilish marosimida Sog'liqni saqlash vazirining birinchi o'rinbosari Davron Tahirovich Sultanov ishtirok etdi. U mazkur hayriya tashabbusi ahamiyatini ta'kidlab, O'zbekistonda tibbiyot sohasini rivojlantirishda bunday xalqaro hamkorlikning katta rol o'ynayotganini qayd etdi.

Saudiya Arabistoni mutaxassislarining tashrifi doirasida bir qator murakkab kardioxirurgik amaliyotlar o'tkazilishi rejalashtirilgan bo’lib, bu orqali yurak kasalliklaridan aziyat chekayotgan ko'plab bemorlarga yordam beriladi.