Syurix klinikasida ishlayotgan o‘zbek jarrohi shifokorlarimiz bilan robot orqali buyrak transplantatsiyasi o‘tkazdi

Qirq uch yoshli vatandoshimiz Dilmurod Eshmo‘minov — Shveytsariyaning dunyoga mashhur Syurix universiteti klinikasida shifokor-xirurg. Ingliz, nemis va fransuz tillarini mukammal biladi.

Inson jigarini tanadan tashqarida 7 kungacha saqlash imkonini beruvchi maxsus texnologiyani yaratishda ishtirok etib, bu ishlanma bilan xalqaro ilmiy jamoatchilik e’tiboriga tushgan.

Qashqadaryo viloyatida o‘sib-ulg‘aygan D. Eshmo‘minov 2006-yilda Toshkent tibbiyot akademiyasini, 2009-yilda akademik V.Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazida rezidentura bosqichini tamomlagan.

So‘nggi yillarda u O‘zbekistondagi hamkasblari bilan hamkorlikni kengaytirib, yangi texnologiyalarni amaliyotga joriy etishga hissa qo‘shib kelmoqda.

Shu kunlarda mamlakatimiz mustaqilligining 35 yilligini nishonlash uchun Toshkentga kelgan vatandoshimiz yurtimiz tarixida ilk bor robot yordamida transplantatsiya amaliyotini o‘tkazishda ishtirok etmoqda.

Keyingi yillarda O‘zbekiston dunyoga ochildi, — deydi Dilmurod Eshmo‘minov. — Barcha sohalarda o‘zgarishlar katta. Tibbiyotda ham salmoqli natijalarga erishilyapti. Bizni shu Vatan, shu xalq o‘qitdi. Endi Syurixda o‘rganganlarimizni yurtimiz tibbiyoti uchun sarflash vaqti keldi. Yangi O‘zbekiston xirurgiyasini jahonga tanitish uchun kamtarona hissamni qo‘shishga tayyorman.

O‘zbek tadqiqotchisining ilmiy salohiyati uchun tamal toshi bo‘lgan Respublika ixtisoslashtirilgan xirurgiya ilmiy-amaliy tibbiyot markazida noyob operatsiya muvaffaqiyatli o‘tkazildi. Robot yordamida bajarilgan buyrak transplantatsiyasi natijasida bemor sog‘lom hayotga qaytdi.

Dilmurod Eshmo‘minov kelgusida bunday innovatsion muolaja usullarini yanada kengroq amaliyotga tatbiq etish uchun markaz bilan hamkorlikni mustahkamlash niyatida.