Цюрих клиникасида ишлаётган ўзбек жарроҳи шифокорларимиз билан робот орқали буйрак трансплантацияси ўтказди

Қирқ уч ёшли ватандошимиз Дилмурод Эшмўминов — Швейцариянинг дунёга машҳур Цюрих университети клиникасида шифокор-хирург. Инглиз, немис ва француз тилларини мукаммал билади.

Инсон жигарини танадан ташқарида 7 кунгача сақлаш имконини берувчи махсус технологияни яратишда иштирок этиб, бу ишланма билан халқаро илмий жамоатчилик эътиборига тушган.

Қашқадарё вилоятида ўсиб-улғайган Д. Эшмўминов 2006 йилда Тошкент тиббиёт академиясини, 2009 йилда академик В.Воҳидов номидаги Республика ихтисослаштирилган хирургия илмий-амалий тиббиёт марказида резидентура босқичини тамомлаган.

Сўнгги йилларда у Ўзбекистондаги ҳамкасблари билан ҳамкорликни кенгайтириб, янги технологияларни амалиётга жорий этишга ҳисса қўшиб келмоқда.

Шу кунларда мамлакатимиз мустақиллигининг 35 йиллигини нишонлаш учун Тошкентга келган ватандошимиз юртимиз тарихида илк бор робот ёрдамида трансплантация амалиётини ўтказишда иштирок этмоқда.

Кейинги йилларда Ўзбекистон дунёга очилди, — дейди Дилмурод Эшмўминов. — Барча соҳаларда ўзгаришлар катта. Тиббиётда ҳам салмоқли натижаларга эришиляпти. Бизни шу Ватан, шу халқ ўқитди. Энди Цюрихда ўрганганларимизни юртимиз тиббиёти учун сарфлаш вақти келди. Янги Ўзбекистон хирургиясини жаҳонга танитиш учун камтарона ҳиссамни қўшишга тайёрман.

Ўзбек тадқиқотчисининг илмий салоҳияти учун тамал тоши бўлган Республика ихтисослаштирилган хирургия илмий-амалий тиббиёт марказида ноёб операция муваффақиятли ўтказилди. Робот ёрдамида бажарилган буйрак трансплантацияси натижасида бемор соғлом ҳаётга қайтди.

Дилмурод Эшмўминов келгусида бундай инновацион муолажа усулларини янада кенгроқ амалиётга татбиқ этиш учун марказ билан ҳамкорликни мустаҳкамлаш ниятида.