Akademik V. Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazida Turkmanistondan kelgan jarroh Serdar Baltayev, abdominal jarrohlik mutaxassisi, malaka oshirish dasturidan o‘tdi.

Doktor Baltayev markazda o‘qish imkoniyatlari bilan oldindan qiziqib, rasmiy taklifnoma asosida Toshkentga keldi. Stajirovka davomida u markaz mutaxassislari bilan birgalikda bir qator operatsiyalarda ishtirok etdi.

O‘quv jarayonida asosiy e’tibor maloinvaziv laparoskopik xirurgiyaga qaratildi. Jumladan, bariatrik xirurgiya, mini-gastroshuntlash va boshqa zamonaviy laparoskopik operatsiyalar jarayonida amaliyotda ishtirok etdi.

Stajirovka yakunida Xirurgiya markazi direktori, professor S.I. Ismailov tomonidan doktor Serdar Baltayevga malaka oshirishni muvaffaqiyatli tamomlagani uchun sertifikat topshirildi.

Shuningdek, Xirurgiya markazi o‘quv markazida xirurgiyaning turli yo‘nalishlari bo‘yicha 33 dan ortiq o‘quv va malaka oshirish sikllari tashkil etilgan. Ushbu dasturlar doirasida mahalliy va xorijiy mutaxassislar zamonaviy xirurgik texnologiyalarni o‘zlashtirish va amaliyotda ishtirok etish imkoniyatiga ega bo‘lmoqda.