2025-yil 29-avgust kuni Akademik V. Vohidov nomidagi Respublika Ixtisoslashtirilgan Xirurgiya Ilmiy - Amaliy Tibbiyot markazida jigar retsipientlari va donorlariga bag‘ishlangan yirik xayriya aksiyasi bo‘lib o‘tdi.

Aksiyada 140 dan ortiq ishtirokchilar qatnashdi. (Ulardan 50 dan ortiq donor–retsipient juftliklari, 35 nafar retsipient, 5 nafar donor), shuningdek, chet elda operatsiya o`tkazgan 40 ga yaqin bemor ushbu tadbirda ishtirok etdi.

Aksiya doirasida barcha ishtirokchilar bepul, kompleks tibbiy ko‘rikdan o‘tdi, markazning yetakchi mutaxassislaridan maslahat oldi va sog‘lig‘ini mustahkamlash hamda keyingi kuzatuv uchun amaliy tavsiyalar berildi.

 Tadbirning eng muhim qismi — jasorat va fidoyilik ko‘rsatgan jigar donorlarini taqdirlash marosimi bo‘ldi. O‘zbekiston Respublikasi Sog‘liqni saqlash vazirligi tashabbusi bilan ularga Sog‘liqni saqlash vaziri A.A. Xudayarov tomonidan imzolangan “Tashakkurnoma”lar topshirildi.

Marosimda O‘zbekiston Respublikasi sog‘liqni saqlash vaziri birinchi o‘rinbosari Alisher Boboyev ishtirok etib, shaxsan donorlarni taqdirladi. Uning ishtiroki mamlakatimizda transplantologiya va donorlik sohasining yuksak ahamiyatga ega ekanini ta’kidladi.

Bundan tashqari, markazning xorijiy hamkorlari — Arsen Yuryevich Popov, Aleksey Nikolayevich Lishchenko va Georgiy Alekseyevich Yefimochkin ham aksiyada qatnashib, O‘zbekistonda transplantologiya rivojiga o‘z hissasini qo‘shib kelayotganini yana bir bor namoyon etdilar.

🇺🇿 Mustaqillikning 34 yilligi va xayriya aksiyasi munosabati bilan markazda bayramona palov tayyorlanib, barcha ishtirokchilar hamda markaz xodimlari dasturxonga taklif etildi.

 Ushbu tadbir nafaqat tibbiy va ijtimoiy ahamiyatga ega bo‘ldi, balki davlat miqyosida donorlar va bemorlarni qo‘llab-quvvatlashning yorqin namunasiga aylandi.

 Akademik V. Vohidov nomidagi Respublika ixtisoslashtirilgan xirurgiya markazi transplantologiyani rivojlantirish, bemorlarni sifatli kuzatish va dunyodagi ilg‘or tibbiy amaliyotlarni mamlakatimizda joriy etishni davom ettiradi.