Хирургия Маркази директори биринчи ўринбосари, профессор Отабек Жўраевич Эшонхўжаев Самарқанд вилоятида хизмат сафарида бўлиб турибди. Сафар Ўзбекистон Республикаси Президентининг 2025 йил 20 январдаги ПҚ-20-сонли қарори ижросини таъминлаш, хусусан инфаркт, инсульт ва бошқа ўткир юрак-қон томир ҳамда мия қон айланиши бузилишларининг олдини олиш чора-тадбирларини тушунтиришга қаратилган.

Ташриф доирасида бирламчи бўғин шифокорлари учун семинар-тренинглар ташкил этилмоқда. Уларда инфаркт ва инсульт ҳолатларини эрта аниқлаш, хавф омилларини баҳолаш, беморларни ўз вақтида тўғри йўналтириш ҳамда шифокорларнинг ўткир юрак-қон томир ҳолатларига тайёрлигини ошириш масалалари муҳокама қилинмоқда.

Дастлабки семинар Пастдарғом туманида бўлиб ўтди. Унда 48 та поликлиникадан 85 нафар шифокор иштирок этди. Мутахассисларга юрак-қон томир касалликларини профилактика қилиш, эрта диагностика ва беморларни тўғри маршрутизация қилиш бўйича замонавий ёндашувлар тақдим этилди.

Бугунги семинар Пайариқ туманида ташкил этилди. Унда 43 та поликлиникадан 94 нафар шифокор иштирок этди.

Учрашувлар давомида профессор О.Ж. Эшонхўжаев Президент қарорида белгиланган вазифаларни амалга оширишда профилактиканинг аҳамиятини алоҳида таъкидлаб, инфаркт ва инсульт ҳолатларини барвақт аниқлаш ва самарали ёрдам кўрсатиш бўйича амалий тавсиялар берди.

Бундай ўқув семинарлари ҳудудларда юрак-қон томир касалликларининг олдини олиш тизимини мустаҳкамлаш ва аҳолига кўрсатилаётган тиббий ёрдам сифатини оширишга хизмат қилади.