Xirurgiya Markazi direktori birinchi o‘rinbosari, professor Otabek Jo‘raevich Eshonxo‘jaev hozirda Samarqand viloyatida xizmat safarida. Safar O‘zbekiston Respublikasi Prezidentining 2025-yil 20-yanvardagi PQ-20-sonli qarori ijrosini ta’minlashga qaratilgan bo‘lib, infarkt, insult va boshqa o‘tkir yurak-qon tomir hamda miya qon aylanishi buzilishlarining oldini olish choralarini tushuntirishni ko‘zda tutadi.  

Tashrif davomida birlamchi bo‘g‘in shifokorlari uchun seminar-treninglar tashkil etilmoqda. Ularda infarkt va insult holatlarini erta aniqlash, xavf omillarini baholash, bemorlarni o‘z vaqtida to‘g‘ri yo‘naltirish hamda shifokorlarning o‘tkir yurak-qon tomir holatlariga tayyorgarligini oshirish masalalari muhokama qilinmoqda.  

Dastlabki seminar Pastdarg‘om tumanida o‘tkazilib, 48 ta poliklinikadan 85 nafar shifokor qatnashdi. Mutaxassislarga yurak-qon tomir kasalliklarini profilaktika qilish, erta diagnostika va bemorlarni to‘g‘ri marshrutizatsiya qilish bo‘yicha zamonaviy yondashuvlar taqdim etildi.  

Bugungi seminar Payariq tumanida bo‘lib o‘tdi. Unda 43 ta poliklinikadan 94 nafar shifokor ishtirok etdi.  

Uchrashuvlar davomida professor O.J. Eshonxo‘jaev profilaktikaning ahamiyatini alohida ta’kidlab, infarkt va insult holatlarini barvaqt aniqlash va samarali yordam ko‘rsatish bo‘yicha amaliy tavsiyalar berdi.  

Bunday o‘quv seminarlar hududlarda yurak-qon tomir kasalliklarining oldini olish tizimini mustahkamlash va aholiga ko‘rsatilayotgan tibbiy yordam sifatini oshirishga xizmat qiladi.