Oʻzbekiston Respublikasi Prezidenti Sh.M. Mirziyoyev boshchiligida 2025-yil 10-noyabr kuni sogʻliqni saqlash tizimi rahbarlari bilan oʻtkazilgan yigʻilishda berilgan topshiriqqa muvofiq, ixtisoslashtirilgan markazlar va tibbiyot muassasalari rahbarlariga rivojlangan davlatlardan menejer-ekspertlarni ishga jalb etib, zamonaviy boshqaruv usullarini joriy qilish hamda muassasalar faoliyati samaradorligini oshirish vazifasi yuklatilgan edi.
Mazkur topshiriq ijrosi doirasida Janubiy Koreya Respublikasining “DK Consulting” kompaniyasidan klinikalar faoliyatini tashkil etish va hospital management sohasida katta tajribaga ega menejerlar Akademik V. Vohidov nomidagi Respublika ixtisoslashtirilgan jarrohlik ilmiy-amaliy tibbiyot markazida (Xirurgiya markazi) oʻz ish faoliyatini boshladi.
Xalqaro boshqaruv kadrlarini jalb etishdan koʻzlangan asosiy maqsad — markazning tashkiliy tuzilmasini yanada takomillashtirish, klinik jarayonlar samaradorligini oshirish hamda zamonaviy hospital management standartlarini bosqichma-bosqich joriy etishdan iborat.
Hamkorlik doirasida DK Consulting mutaxassislari strategik rejalashtirish tizimini optimallashtirish, raqamli boshqaruv yechimlarini rivojlantirish, klinik amaliyotga tejamkor boshqaruv tamoyillarini joriy etish, shuningdek, tibbiy yordam sifati va xavfsizligini ichki nazorat qilish mexanizmlarini takomillashtirishda bevosita ishtirok etadi.
Maʼlumki, Janubiy Koreya Respublikasi tibbiy xizmatlarni samarali tashkil etish, sogʻliqni saqlashni raqamlashtirish va yuqori texnologiyali tibbiy yordamni boshqarish sohasida dunyoda yetakchi davlatlardan biri hisoblanadi. Ushbu ilgʻor tajribani amaliyotga tatbiq etish Xirurgiya markazining institutsional salohiyatini mustahkamlash va uning xalqaro maydondagi raqobatbardoshligini oshirishga xizmat qiladi.
Qoʻshma ish rejasi doirasida boshqaruv jarayonlarini kompleks audit qilish, institutsional rivojlanish boʻyicha “yoʻl xaritasi”ni ishlab chiqish, maʼmuriy xodimlarni zamonaviy operatsion menejment instrumentlariga oʻqitish hamda boʻlimlar samaradorligini baholash uchun KPI-modellarini joriy etish nazarda tutilgan.
Markaz rahbariyati mazkur tashabbusni muassasani modernizatsiya qilish va uni xalqaro darajadagi klinikaga aylantirish strategiyasini amalga oshirishda muhim va tizimli qadam sifatida baholamoqda.
