Kecha, 2026 yil 16 yanvar kuni, Akademik V. Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazida O‘zbekiston davlat sog‘liqni saqlash tizimida ilk quyidagi ikki robot-assistentli jarrohlik amaliyoti muvaffaqiyatli bajarilgani haqida xabar bergan edik. Ular:

Birinchi bemor Namangan viloyatidan bo‘lib, “yo‘g‘on ichakning rektosigmoid soxasi  o‘smasi” tashxisi bilan robot assistentli operativ davolash o‘tkazildi.

Ikkinchi bemor Toshkent shahridan bo‘lib, “diafragma qizilo‘ngach teshigi churrasi” tashxisi bilan robot-assistentli amaliyot bajarildi.

Bugun esa robot-assistentli jarrohlik dasturi izchil davom etdi.

Uchinchi bemor Surxondaryo viloyatidan,
to‘rtinchi bemor Toshkent viloyatidan bo‘lib, ularda ham robot-assistentli jarrohlik amaliyotlari muvaffaqiyatli o‘tkazildi. Barcha bemorlarning ahvoli barqaror, tiklanish jarayoni mutaxassislar nazoratida davom etmoqda.

Alohida ta’kidlash joizki, ushbu bemorlarning barchasi imtiyozli toifa vakillari bo‘lib, operatsiyalar Davlat tibbiy sug‘urta jamg‘armasi mablag‘lari hisobidan bepul amalga oshirildi. Bu — mamlakatimizda sog‘liqni saqlash sohasida yaratilayotgan sharoitlar, izchil olib borilayotgan islohotlar va aholiga zamonaviy tibbiy yordamni teng va adolatli yetkazish siyosatining amaliy natijasidir.

Robot-assistentli jarrohlikning joriy etilishi Markaz jarrohlarining yuqori salohiyati, xalqaro hamkorlik va davlat qo‘llab-quvvatlovining yorqin samarasidir. Akademik V. Vohidov nomidagi Respublika Xirurgiya Markazi bugun nafaqat mamlakatimiz, balki mintaqada ham yuqori texnologiyali tibbiyotning yetakchi markazlaridan biri sifatida yangi bosqichga chiqmoqda.

Dastur davom etadi. Oldinda yana yangi operatsiyalar, yangi tajriba va yangi yutuqlar turibdi.