Bugun, 2026 yil 16 yanvar kuni, Akademik V. Vohidov nomidagi Respublika ixtisoslashtirilgan ilmiy-amaliy tibbiyot markazi jarrohlik markazida robot-assistentli jarrohlik tizimini rasmiy ishga tushirish bo‘yicha tantanali marosim bo‘lib o‘tdi. Ushbu tizim O‘zbekiston Respublikasi davlat sog‘liqni saqlash tizimida joriy etilgan birinchi robotlashtirilgan jarrohlik majmuasi hisoblanadi.

Tadbirda O‘zbekiston Respublikasi sog‘liqni saqlash vazirining birinchi o‘rinbosari Boboyev Alisher Shukrullayevich, Markazning yetakchi mutaxassislari hamda Xitoy Xalq Respublikasidan tashrif buyurgan xorijiy ekspertlar ishtirok etdilar. Videokonferensiya aloqa tizimi orqali mamlakatimizning barcha viloyat ko‘p tarmoqli shifoxonalarining jarrohlik bo‘limlari marosimga ulandi.

Rasmiy qismdan so‘ng, tasdiqlangan dasturga muvofiq, O‘zbekiston davlat sog‘liqni saqlash tizimida ilk robot-assistentli operatsiyalar bajarildi.

1960 yilda tug‘ilgan bemorda, “yo‘g‘on ichak o‘smalari” tashxisi bilan hamda
1971 yilda tug‘ilgan bemorda, “diafragma qizilo‘ngach teshigi churrasi” tashxisi bilan robot-assistentli jarrohlik amaliyotlari muvaffaqiyatli amalga oshirildi.

Operatsiyalar Xitoy Xalq Respublikasining yetakchi mutaxassislari — professor Tsuy Chunhui (Cui Chunhui) va dotsent Se Lang (Xie Lang) hamda Markazning mahalliy jarrohlari hamkorligida bajarildi.

Robotlashtirilgan jarrohlikning ishga tushirilishi O‘zbekistonda kam invaziv va yuqori texnologiyali operatsiyalarni rivojlantirishda yangi bosqichni boshlab beradi, milliy robot-assistentli jarrohlik maktabini shakllantirish va zamonaviy texnologiyalarni hududiy tibbiyot muassasalariga bosqichma-bosqich joriy etish uchun mustahkam zamin yaratadi.