Академик В. Воҳидов номидаги Республика ихтисослаштирилган хирургия илмий-амалий тиббиёт марказида қариндош донорларидан жигар бўлагини кўчириб ўтказиш операциясидан ўтган беморларнинг навбатдаги муваффақиятли чиқарилиши ҳақида маълум қиламиз.

Бу сафар беморлар қуйидаги ҳудудлардан келган:
 • Қўқон шаҳридан,
 • Бухоро вилояти Шофиркон туманидан,
 • Фарғона вилояти Қувасой шаҳридан,
 • Наманган вилоятидан.

Тўрт нафар бемор ҳам жорий йилнинг январ ойида режа асосида тўлиқ тайёрланиб, операция қилинди. Жарроҳлик амалиётлари муваффақиятли бажарилди, операциядан кейинги ва реабилитация даври асоратларсиз кечди. Ҳозирги вақтда беморлар қониқарли ҳолатда яшаш жойи бўйича кейинги динамик кузатув учун чиқарилмоқда.

Алоҳида таъкидлаш жоизки, Марказда қариндош донорлик асосидаги жигар трансплантациялари тизимли ва мунтазам равишда амалга оширилади. Ушбу операциялар режа асосидаги юқори технологик тиббий ёрдам доирасида, босқичма-босқич операциягача тайёрлаш, мултидисциплинар кузатув ҳамда кейинги реабилитация билан бирга олиб борилади.

Марказ трансплантология йўналишини изчил ривожлантириб, ҳудудлардан келаётган беморлар учун замонавий, хавфсиз ва юқори технологик жарроҳлик ёрдамидан фойдаланиш имкониятини кенгайтириб бормоқда.