Soʻgʻliqni saqlash vazirligida XIRURGIYA MARKAZI boshqaruv tizimini isloh qilish masalalari muhokama qilindi
Bugun Oʻzbekiston Respublikasi Soʻgʻliqni saqlash vazirligida akademik V. Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazi boshqaruv tizimini yanada rivojlantirish va modernizatsiya qilishga bagʻishlangan muhim ishchi uchrashuv boʻlib oʻtdi.
Uchrashuvda XIRURGIYA MARKAZI direktori professor Saydimurad Ibragimovich Ismailov, shuningdek jalb etilgan xorijiy ekspertlar — bosh menedjer Kim Chul So hamda boshqaruv tizimini rivojlantirish va isloh qilish boʻyicha menedjer doktor Shin Dong Eun ishtirok etdilar. Uchrashuvni Oʻzbekiston Respublikasi sogʻliqni saqlash vaziri Asilbek Anvarovich Xudayarov olib bordi.
Uchrashuv davomida xorijiy menedjerlar tomonidan XIRURGIYA MARKAZI boshqaruv tizimini isloh qilish boʻyicha ishlab chiqilgan loyiha taqdim etildi. Unda muassasaning zamonaviy, samarali va barqaror tibbiyot tashkiloti sifatida rivojlanishi boʻyicha oʻz qarashlari va takliflari bayon etildi.
Taqdim etilgan loyiha XIRURGIYA MARKAZIda shaffof va tizimlashtirilgan boshqaruv modelini shakllantirish, asosiy samaradorlik koʻrsatkichlari (KPI) asosida boshqaruvni joriy etish, bemorlar oqimini va klinik jarayonlarni optimallashtirish, tibbiy raqamli tizimlarni rivojlantirish, xarajatlar va moliyaviy jarayonlar ustidan nazoratni kuchaytirish hamda zamonaviy xirurgiya markazi modelini shakllantirishni nazarda tutadi.
Oʻzbekiston Respublikasi sogʻliqni saqlash vaziri Asilbek Anvarovich Xudayarov taqdim etilgan loyiha bilan batafsil tanishib, mazkur tashabbuslar sogʻliqni saqlash tizimini isloh qilishga qaratilgan davlat siyosatiga toʻliq mos kelishini taʼkidladi.
Uchrashuvda alohida qayd etildiki, xorijiy mutaxassislar va ilgʻor boshqaruv tajribasini jalb qilish Oʻzbekiston Respublikasi Prezidentining bevosita topshirigʻi asosida amalga oshirilmoqda. Davlat rahbari mamlakat tibbiyot muassasalarining moddiy-texnik bazasini mustahkamlash, zamonaviy texnologiyalarni joriy etish va sogʻliqni saqlash tizimini modernizatsiya qilishga katta eʼtibor qaratmoqda.
Vazir tomonidan barcha tashabbuslar qoʻllab-quvvatlanib, jumladan poliklinika faoliyatini takomillashtirish, statsionar boshqaruvini modernizatsiya qilish hamda zamonaviy tibbiy menedjment prinsiplarini joriy etish boʻyicha vazirlik har tomonlama koʻmak koʻrsatishi taʼkidlandi.
Mazkur islohotlar amalga oshirilishi XIRURGIYA MARKAZI faoliyati samaradorligini yanada oshirish, tibbiy xizmat sifatini yaxshilash, muassasaning moliyaviy barqarorligini mustahkamlash va xalqaro standartlarga mos zamonaviy boshqaruv modelini shakllantirishga xizmat qiladi.
