Қўшма жарроҳлик дастурининг биринчи куни: тирик донордан жигар трансплантацияси

Якшанба куни бўлишига қарамасдан, Академик В. Воҳидов номидаги Республика ихтисослаштирилган хирургия илмий-амалий тиббиёт маркази жамоаси Хитойнинг «Renji Hospital» клиникаси мутахассислари билан биргаликда халқаро жигар трансплантацияси дастури доирасидаги биринчи операцияни бошлади.

Биринчи бемор — Наманган вилоятидан 42 ёшли Кимсанова Д. бўлиб, у оғир жигар касаллиги билан хасталанган. Унга 19 ёшли ўғли Абдакимов С. онасининг ҳаётини сақлаб қолиш мақсадида ўз жигарининг бир қисмини донор сифатида беришга қарор қилган.

Эрта тонгдан операция хоналарида қизғин иш жараёни давом этмоқда. Икки мамлакат хирурглари ва анестезиологларидан иборат жамоалар зарур тайёргарлик ишларини якунлаб, режалаштирилган жарроҳлик босқичларини бажаришга киришдилар.

Тайёргарлик ишлари режа асосида кетмоқда. Жамоалар операциянинг асосий босқичи — донордан олинган жигар бўлагини реципиентга трансплантация қилишга тайёр.

Олдинда барча мутахассислардан юқори масъулият ва ҳамжиҳатликни талаб этадиган мураккаб жараён турибди. Ушбу қўшма операция ўзаро тажриба алмашиш ва жигар трансплантациясининг замонавий технологияларини ўзлаштиришда муҳим амалий босқич бўлади.